Wateja wa Benki ya Absa Tanzania Wana Fursa ya Kushinda Subaru Forester 2014 Tatu Kupitia Kampeni ya Kusisimua ya "Spend & Win"

 

Benki ya Absa Tanzania leo imezindua kampeni ya “Spend & Win,” ambayo ni promosheni ya kusisimua inayolenga kuhimiza matumizi ya njia za kidigitali za kibenki huku ikiwapa wateja fursa ya kushinda gari mpya aina ya Subaru Forester 2014 kila mwezi kwa miezi mitatu ijayo. Kampeni hii inasisitiza dhamira ya benki hiyo katika kuendeleza ujumuishaji wa kifedha na inalingana na lengo lake la "Kuwawezesha Waafrika wa kesho, pamoja, hatua moja baada ya nyingine" na ahadi yake ya chapa "Stori yako ni thamani."

Akizungumza wakati wa mkutano na waandishi wa habari uliofanyika Palm Village, Ofisa Mkuu wa Fedha wa Benki ya Absa Tanzania, Bw. Bernard Tesha, aliyemwakilisha Mkurugenzi Mtendaji wa benki hiyo, Bw. Obedi Laiser, alisisitiza lengo la kampeni hiyo la kukuza matumizi ya teknolojia za kidigitali nchini kote.

"Tumewekeza sana katika mabadiliko ya kidigitali ili kuhakikisha tunakidhi mahitaji ya wateja wetu yanayobadilika huku tukiiunga mkono ajenda ya serikali ya kuongeza ujumuishaji wa kifedha," alisema Bw. Tesha. "Kampeni ya 'Spend & Win' imeundwa kuhimiza Watanzania wengi zaidi kutumia suluhisho za kibenki za kidigitali, kama vile kadi zetu za debit na credit, ambazo hutoa usalama, urahisi, na upatikanaji wa huduma mbalimbali za kibenki."

Kampeni hiyo, ambayo inaanza tarehe 10 Septemba 2024 hadi 10 Desemba 2024, itamfanya mteja mmoja mwenye bahati kila mwezi kushinda Subaru Forester 2014. Forester, inayojulikana kwa kuwa moja ya SUV zinazouzwa zaidi za Subaru na kupigiwa kura kuwa moja ya magari salama zaidi sokoni, inalingana na dhamira ya Absa ya kuhakikisha usalama wa wateja wake. Bw. Tesha alihusisha usalama wa gari hilo maarufu na usalama wa miamala ya kadi za Absa.

"Kama vile Subaru Forester inavyotoa usalama na kutegemewa barabarani, kadi zetu za debit na credit za Absa zinahakikisha kuwa miamala ya kifedha ya wateja iko salama, ina usalama, na ni rahisi. Kwa kutumia kadi zao za Absa, wateja hawapati tu amani ya akili, bali pia wanapata fursa ya kushinda zawadi kubwa," aliongeza Bw. Tesha.

Mchakato wa kampeni ni rahisi – mteja yeyote wa Benki ya Absa Tanzania anayefanya miamala kwa kutumia kadi yake ya debit au credit moja kwa moja anastahiki kuingia kwenye droo ya bahati nasibu. Wateja watakaokidhi kigezo cha miamala 20 ya kadi, yenye thamani ya jumla ya angalau TZS milioni 5 ndani ya kipindi cha kampeni, watapata tiketi za droo ya kila mwezi. Aidha, wateja wanaotumia majukwaa ya kidigitali ya benki ya Absa watapata tiketi za bonasi.

Bi. Ndabu Swere, Mkuu wa Kitengo cha Benki cha Wateja Binafsi, alifafanua kuhusu masharti ya kampeni hiyo: "Tunataka kampeni hii iwe shirikishi na yenye matokeo chanya. Wateja waliopo pamoja na wateja wapya wanakaribishwa kushiriki. Kadri wanavyofanya miamala mingi, ndivyo nafasi zao za kushinda zinavyoongezeka," alisema Bi. Ndabu.

 "Miamala ya kibenki ya kidigitali kupitia majukwaa kama vile Absa Mobile Banking, Internet Banking, na Hello Money pia inawapa wateja tiketi za ziada za droo, kuhakikisha kwamba wale wanaotumia suluhisho za kidigitali wanapata nafasi kubwa zaidi ya kushinda."

Kampeni ya "Spend & Win" pia inaunga mkono lengo la Absa la kupanua ujumuishaji wa kifedha nchini Tanzania kwa kuhimiza wateja kuachana na njia za kibenki za kiasili na kuhamia kwenye miamala ya kidigitali. Matumizi ya teknolojia za kidigitali yanatoa urahisi na pia husaidia kupunguza miamala inayotegemea fedha taslimu, jambo ambalo ni muhimu kwa jitihada za serikali za kukuza ujumuishaji wa kifedha.

"Tunaamini kwamba kuongeza matumizi ya kidigitali ni muhimu kwa kukuza ujumuishaji wa kifedha nchini Tanzania," alisema Bw. Tesha. "Uwekezaji wetu katika miundombinu ya kidigitali unatufanya tuweze kutoa huduma za benki zilizo salama na zinazofikika kwa wateja, bila kujali walipo nchini. Tunafurahia kutoa kampeni inayounga mkono maono haya huku tukiwapa wateja fursa ya kubadilisha hadithi yao kwa kushinda Subaru Forester mpya."

"Kampeni inyokwenda kwa jina la, ‘Kushinda gari kunaweza kubadilisha hadithi yako,’ kinatokana na ahadi yetu ya chapa ‘Stori  yako ina thamani.’ Katika Absa, tunataka kuwa sehemu ya safari ya wateja wetu, tukiwasaidia kufikia malengo na ndoto zao, hatua kwa hatua," aliongeza Bw. Tesha.

Absa inawaalika Watanzania wote kushiriki katika kampeni ya “Spend & Win,” iwe ni wateja wa muda mrefu au wapya kwenye familia ya Absa. Kwa wale ambao bado hawajawa wateja, mchakato ni rahisi: fungua akaunti, pata kadi yako, na anza kufanya miamala ili kupata nafasi ya kushinda.