WAZIRI SIMBACHAWENE AELEZA WALIYOJIFUNZA KUHUSU MRADI AJIRA ZA KIJAMII KWA WATU WASIOKUWA NA UWEZO

 

WAZIRI wa Nchi, Ofisi ya Rais (Menejimenti, Utumishi na Utawala Bora) George Simbachawene ameleeza namna walivojifunza kuhusu mradi wa ajira za kijamii kwa watu wasiokuwa na uwezo katika Taifa la Afrika Kusini.

Waziri Simbachawene ameyasema hayo leo Machi 19,2025 nchini Afrika Kusini wakati wa majumuisho ya ziara ya kimafunzo ya siku tano nchini humo kuhusu ajira za jamii kwa watu wasiokuwa na uwezo, kama ambavyo nchini inavyotekelezwa  na TASAF kwa ajili ya kuzisaidia kaya na familia masikini.

Katika maelezo yake, Waziri Simbachawene aliyeambatana na viongozi waandimizi wa Mfuko wa Maendeleo ya Jamii ( TASAF),amesema nchi hiyo imepiga hatua katika suala hilo, na kuongeza Serikali ya nchi hiyo, haijaishia tu kuwezesha wasiokuwa ajira bali wanashughulika na ukosefu wa ajira.

" Mbali na kuwezesha watu wasiojiweza kupitia ajira wenzetu wamekwenda mbali zaidi kwa kutatua changamoto ya ajira kwa vijana waliosoma na wasiosoma, lakini pia wanawajenga ujuzi.

" Pia wenzetu wanashughulika na kuwaanda watu watakaoweza kufanya biashara, kimsingi ukosefu wa ajira na kupambana na umasikini haviachani.Wenzetu wametenga bajeti na wana wizara maalumu inayoshugulikia ajira za umma," amesema Waziri Simbachawene.

Amesema wizara hiyo ina jukumu la kuhakikisha kila mradi wa umma unaotekelezwa basi lazima wachukue na kuingizwa katika mpango na kulipwa mshahara na Serikali.

" Zaidi ya hayo vijana hao, wanajengewa uwezo na ujuzi wa kujitegemea na kuanzisha biashara zao au kwenda kujiunga na kuajiriwa na watu wengine.Pia wanajihusisha na kundi la watu masikini katika jamii kama ambavyo Tasaf wanafanya," amesema Waziri Simbachawene.

Kwa upande wake Mkurugenzi Mtendaji wa TASAF, Shadrack Mziray amesema wamehitimisha ziara yao siku tano  kwa kutembelea eneo la uhifadhi maalumu wa misitu lililopo nchini humo

"Pamoja na kufanya uhifadhi, eneo lina fursa ya ajira kwa walengwa ambao wapo mpango wa ajira za umma.Tulichojifunza katika hizi siku tulizokuwa hapa ni kwamba fursa zinapatikana siyo tu kwa kubuni vitu vipya bali tunaweza kushirikiana na Serikali au sekta binafsi kwa shughuli wanazozifanya zikawachukua walengwa wetu na kupata fursa za ajira,”amesema Mziray.